မေ ၂၃ ရက် ၀မ်ပေါင်၏ ပလောင်ရွာစည်းရုံးရေး ခရီးစဉ်တွင် ကန့်ကွက်နေ သည့် ဒေသခံဦးညိုနှင့် ၀မ်ပေါင်မှ တာဝန်ရှိသူများကို တွေ့ရစဉ်
လက်ပံတောင်းတောင်စီမံကိန်း လုပ်ဆောင်နေသည့် မြန်မာ့စီးပွားရေးဦးပိုင်၊ တရုတ်ဝမ်ပေါင်ကုမ္ပဏီနှင့် တာဝန်ရှိသူများက ဒေသခံများကို ရန်သူသဖွယ် ဆက်ဆံနေသည်ဟု ပဏ္ဍိတဖွံ့ဖြိုးရေး အင်စတီကျုက ရန်ကုန်မြို့ရှိ မြန်မာဂျာနယ်လစ်ကွန်ရက် ရုံးခန်းတွင် ဇွန် ၂ ရက်က ပြုလုပ်သည့် လက်ပံတောင်းတောင် ကြေးနီစီမံကိန်း တာဝန်သိရင်းနှီးမြှုပ်နှံမှု အစီရင်ခံစာအကြောင်း သတင်းစာရှင်းလင်းပွဲတွင် ပြောကြားသည်။
“ဒေသခံတွေကို စီးပွားဖက်အဖြစ် ဆက်ဆံသင့်ပေမဲ့ လက်ရှိအခြေအနေမှာ သူတို့က ပါဝင်ခွင့်မရဘူး။ ဒေသခံတွေကို ရန်သူလို မြင်နေတယ်။ ခြိမ်းခြောက်ခံနေရတယ်။ စီမံကိန်းကြောင့် ဘာသာရေးဆိုင်ရာ နစ်နာမှုနဲ့ ကိုးကွယ်ယုံကြည်မှုဆိုင်ရာ နစ်နာမှုတွေဖြစ်ခဲ့တယ်။ လယ်ယာလုပ်တဲ့ဝင်ငွေနဲ့ ၀မ်ပေါင်ကုမ္ပဏီမှာ ၀န်ထမ်းလုပ်တဲ့ငွေက ကွာဟတော့ အကြွေးတွေထပ်တင်တယ်။ လယ်ယာသိမ်းခံရလို့ စိတ်ပိုင်းဆိုင်ရာ ထိခိုက်မှုတွေကိုလည်း ကုစားနိုင်ဖို့လိုတယ်။ ပတ်ဝန်းကျင်ထိခိုက်မှုနဲ့ ရပ်ရွာထိခိုက်မှုအတွက် ဒေသခံတွေရဲ့ သဘောတူညီချက် စစ်တမ်းမပါဘဲ စီမံကိန်းလုပ်ခွင့်ပြုခဲ့တဲ့ ၀န်ကြီးဌာနတွေ ကြားမှာလည်း အကျင့်ပျက်လာဘ်စားမှုတွေ တွေ့ခဲ့ရတယ်။ ဒီလိုဖြစ်ရပ်တွေကြောင့် တရုတ်ကုမ္ပဏီတွေကို မြန်မာပြည်သူတွေက ယုံကြည်မှုမရှိတော့ဘူးဓ ဟု ပဏ္ဍိတဖွံ့ဖြိုးရေး အင်စတီကျုမှ ဦးပြေငြိမ်းကျော်က ဆိုသည်။
မြန်မာဝမ်ပေါင်ကုမ္ပဏီမှ ပြုလုပ်သည့် သဘာဝပတ်ဝန်းကျင်နှင့် လူမှုရေးဆိုင်ရာ ဆန်းစစ်ချက်များ ပြုလုပ်ရာတွင် ၎င်းတို့လိုလားသော အချက်များကိုရရှိနိုင်သည့် ကျေးရွာများကိုသာရွေးချယ်၍ အချက်အလက်များ ကောက်ယူခဲ့ကြောင်း အစီရင်ခံစာတွင် ဖော်ပြထားသည်။
ရွာသစ်သို့ ပြောင်းရွှေ့မည်ဆိုပါက ကြေးနီစီမံကိန်းတွင် အနည်းဆုံးတစ်အိမ်ထောင် တစ်ယောက်နှုန်းဖြင့် အလုပ်ရရှိစေမည် ကတိက၀တ် ပြုထားသော်လည်း လက်တွေ့တွင် ဖြစ်မလာကြောင်း အစီရင်ခံစာတွင် ဖော်ပြထားသည်။ ပြောင်းရွှေ့ရန် ကျန်ရှိနေသည့် ရွာဟောင်းများတွင် ပြောင်းရွှေ့လိုသူနှင့် မပြောင်းရွှေ့လိုသူ နှစ်ပိုင်းကွဲနေပြီး မပြောင်းရွှေ့လိုသူများမှာ လယ်ယာမြေများ သိမ်းယူထားပြီး တန်ရာတန်ကြေးမပေးခြင်း၊ ကုမ္ပဏီရှိ ၀န်ထမ်းများအနေဖြင့် ကျေးရွာများအပေါ်တွင် တာဝန်မဲ့မှုနှင့် ရန်သူကဲ့သို့ ဆက်ဆံခြင်း၊ ကျေးရွာလူထုနှင့် ပူးပေါင်းဆောင်ရွက်မှုမရှိခြင်း စသည့်အဖြစ်များကြောင့် ဖြစ်ကြောင်း အစီရင်ခံစာတွင် ဖော်ပြထားသည်။
ဒေသခံများက ၎င်းတို့၏ အနာဂါတ် ဘ၀လုံခြုံမှုအပေါ် စိုးရိမ်နေပြီး ကုမ္ပဏီနှင့် အာဏာပိုင်များ၏ ခြိမ်းခြောက်မှုများ မကြာခဏ ကြုံတွေ့နေသည်။ ကျန်ရှိလယ်မြေများ ထပ်မံသိမ်းဆည်း မခံနိုင်သဖြင့် လယ်မြေများအပေါ် ညအိပ်စောင့်နေရသည့် အလုပ်တစ်ခု တိုးလာနေကြောင်း အစီရင်ခံစာတွင် ဖော်ပြထားသည်။
ဝမ်ပေါင်ကုမ္ပဏီက ဒေသခံတို့၏ လူနေမှုဘ၀ အရည်အသွေး တိုးတက်ရေး၊ ဆင်းရဲမှုလျှော့ချရေး၊ ကျန်းမာရေး စောင့်ရှောက်မှု၊ လျှပ်စစ်မီး၊ ရေကောင်းရေသန့်ရရှိမှု၊ ပညာရေး၊ လမ်းဖောက်ခြင်းနှင့် ဘာသာတရားအတွက် ဘုန်းတော်ကြီးကျောင်းများ အသစ်ပြန်လည် တည်ဆောက်ခြင်းများကို လုပ်ဆောင်ပေးနေကြောင်း ကုမ္ပဏီ၏ တရားဝင်အင်တာနက် စာမျက်နှာတွင် ဖော်ပြထားသော်လည်း လက်တွေ့တွင် တကယ်ဖြစ်မနေဘဲ ကွာဟနေကြောင်း အစီရင်ခံစာတွင် ဖော်ပြထားသည်။ လယ်သိမ်းခံ ဒေသခံများအနေဖြင့် လယ်မြေဆုံးရှုံးခြင်း၊ ခြိမ်းခြောက်ခံရခြင်း၊ ဥပဒေမဲ့ပြုလုပ်ခြင်းစသည့် မတရားမှုများခံခဲ့ရပြီး ယင်းတို့၏ ပိုင်ဆိုင်မှုများ ပြန်လည်ရရှိရန်အတွက် မည်သည့်ဥပဒေ၏ အကူအညီမျှ ရရှိမှုမရှိခဲ့ကြောင်းလည်း အစီရင်ခံစာတွင် ဖော်ပြထားသည်။
မြန်မာ့စီးပွားရေးဦးပိုင် အနေဖြင့် နိုင်ငံခြားကုမ္ပဏီဖြစ်သည့် မြန်မာဝမ်ပေါင်ကုမ္ပဏီနှင့် သတ္တုတွင်းလုပ်ငန်း လုပ်ကိုင်ရန် ခွင့်ပြုသည့် အမိန့်ကြော်ငြာစာကို ထုတ်ပြန်ထားခြင်းမရှိဘဲ စည်းမျဉ်းနှင့် ကိုက်ညီမှု မရှိသော ရင်းနှီးမြှုပ်နှံမှုကို ပြုလုပ်ခဲ့ပြီး တည်ဆဲဥပဒေများကို လေးစားမှုမရှိကြောင်း အစီရင်ခံစာတွင် ဖော်ပြခဲ့ကာ သတ္တုတွင်း ၀န်ကြီးဌာနသည်လည်း နိုင်ငံတော်အဆင့်စီမံကိန်းကို မသိကျိုးကျွံပြုလုပ်ခဲ့ကြောင်း အစီရင်ခံစာတွင် ဖော်ပြခဲ့သည်။
နော်ဝေပြည်သူများ ထောက်ပံ့ရေးအဖွဲ့၏ ထောက်ပံ့မှုဖြင့်ကောက်ခံခဲ့သည့် လက်ပံတောင်းတောင် ကြေးနီ စီမံကိန်း တာဝန်သိရင်းနှီးမြှုပ်နှံမှု အစီရင်ခံစာအား ငွေကြေးနှင့် လူသားအရင်းအမြစ် အခက်အခဲကြောင့် ကျေးရွာငါးရွာသာ စစ်တမ်းကောက်ယူနိုင်ခဲ့သည်။ ထိုစစ်တမ်းအတွက် ဒေသခံများ၏ ဖြေဆိုမှုများအပေါ် လက်ရှိဖြစ်ပျက်နေမှုများနှင့် အနေအထားများအပေါ် ချိန်ဆက်၍ အစီရင်ခံစာအား ရေးသားခဲ့ပြီး အမှန်တရားအပေါ်သာ အခြေခံထားကြောင်း ပဏ္ဍိတဖွံ့ဖြိုးရေး အင်စတီကျုမှ ဦးပြေငြိမ်းကျော်က ဆိုသည်။ ယင်းအစီရင်ခံစာကို မြန်မာ့စီးပွားရေးဦးပိုင်၊ ၀မ်ပေါင်၊ စစ်ကိုင်းတိုင်းဒေသကြီး အစိုးရအဖွဲ့၊ မြန်မာနိုင်ငံ အမျိုးသား လူ့အခွင့်အရေး ကော်မရှင်နှင့် အခြားသော တာဝန်ရှိသူများထံ ပေးပို့မည်ဖြစ်ကြောင်း သိရသည်။
Eleven Media Group
No comments:
Post a Comment